I Samuela 15 : 22-23 - Upa Vanlalrawna

 I Samuela 15 : 22-23 

Tin, Samuela chuan, "LALPA chuan LALPA thu zawm chu a lawm angin hâlral thilhlante leh inthawinate hi a lawm em ni? Ngai teh, inthawina aiin thuawih chu a ṭha zawk a, berâmpa thau aiin a thu pawm chu a ṭha zawk a ni. Helna hi aienthiamna sualte nen a inang a, luhlulna hi milem biak leh Pathian lem biak tluk a ni. LALPA thu i duh loh avângin ani pawhin lal atân a duh ta bik lo che a ni," a ti a.

Sawibelhna :  Chu mi hunah chuan, " ‘Nangni thil sual tite u, ka hre ngai lo va che u, ka hnen ata kal bo rawh u,’ tiin anni chu ka la hrilh ang," tia (Mt.7:32) Lal Isuan hun tawpa a hrem tur pawh, a thu zawmloh vang niin a lang. "Keimah hi kawng leh thutak leh nunna ka ni; keimaha kal lo chu tumah Pa hnenah an thleng ngai lo," a ti bawk. (Johana 14:6) 

Chuvangin, vawiinah hian Lalpan kawng min kawhhmuh angin nge mihring duh danin kan nung zawk? A thutak min zirtir angin nge mihring zirtirna kan zawm zawk? Nunna nei turin amah Isua nge kan rin a, khawvel thilah kan innghat zawk? "Chutichuan, mi tin heng ka thu hi hriaa zawm apiang chu, mi fing lungpui chunga in satu nen tehkhin tur a ni," Lalpan a ti.  (Mt 7:24)

Saula, Israel lal atana ruattu chu Lalpa a ni a; mahse amah ruattu Lalpa thu a zawm duh lova. Chuvangin, Lalpa pawhin lal atan a hnawl ta a ni. Lal Isua ringtute pawh, min kohchhan leh hruaitua min ruattu Lalpa duhdanin  kan nung em? tih mahni kan inzawh a pawimawh hle mai, a chhan chu Lalpan kan chungah ro a la rel dawn vang a ni. "Dan petu leh roreltu pakhat chauh a awm, chhandam theia tiboral theia chu; nang ṭhenawmte sawiseltu chu tunge maw i nih le?" tih ziak a ni. (Jakoba 4:12) 

Ni, Lalpa chuan halral thilhlante leh inthawinate aiin a thu zawm leh a thuawih a lawm zawk a. Keini pawh hian hna thawk tura kan lak, kan hnuaia thawkte pawh thuawih turin kan duh ṭhin. Kan lakah helin, luhlul chhuah se, kan thu awih lo se, engtin nge kan lawm theih ang? 

Lalpan a kawng min kawhhmuh thianghlimna leh remna kawng zawh lova, khawvel ropuina leh thianghlim lohna - sual kawng kan zawh si chuan kan inthawinate leh kohhran tana kan thawh te hian awmzia a nei dawn em ni? 'Ngai teh, inthawina aiin thuawih chu a ṭha zawk a...Helna hi aienthiamna sualte nen a inang a, luhlulna hi milem biak leh Pathian lem biak tluk a ni,' tih hi Lalpa thuchhuak chu a ni.Pathian duhdan nge, mihring duhdan zawk kan zawm dawn? A eng kawng zawk hi nge kan unaute leh, kan fate kan kawhhmuh dawn?