HMANGAIHNA RAM

 HMANGAIHNA RAM.........

"Aw.., Hmangaihna, hmangaihna ram Zion tlang mawi chu,aw lo èng tawh rawh. Van Jerusalem khawpui thar nuama lèngte zawng chuan lungngaihna biahthu reng reng hi an sawi ngai tawh lo,ka Lal lenna ram mawia lèngte zawng chuan..."

tiin hla siamtu chuan nghakhlel takin Lalpan a hmangaihte ram a buatsaih lo la thleng tur chu thlirin a au a.

Ni e,ringtute chuan Hmangaihna ram Zion hi ngaiin kan kùr thin a,kan beisei leh nghahfak a ni a,a ram ngaih hian kan ngai thin a ni ti ru maw? Chu Hmangaihna Ram Zion,van Jerusalem tharah chuan natna leh lungngaihna te,itsikna leh elrelna te,inhuatna leh inhmelmàkna te a awm tawh dawn si lo va,a nuamin a hlimawm anga,a hahdam thlakin a thlamuan thlak dawn èm avangin nghakhlel taka auh ruai ruai mai pawh a awm a ni e.

Amaherawhchu,Kohhran hote hian, he hmangaihna ram lo la thleng tur hi nghakhlel taka thlira,chumi hun lo thleng tura innghat ringawt lo hian ringtu nun kawng kan zawh mèk lai hian hmangaihna rama chengte awmdan tur hi ataka hman theih chin kan nei ve reng lo maw?? Chutiang tur chuan inbuatsaih theuh ila,a takin nunpui ila,a va nuam dawn em! Chutiang a nih chuan he leiah hian Hmangaihna ram chu kan lo tem lawk thei reng mai dawn a lo ni.

Hmangaihna hi a pawimawh si a,Pathian thu pawhin a ngaipawimawh èm èm a ni. Tun hunah hian Kohhran hote hian kan thlahthlam ta hle mai niin a lang a,a pawi èm èm a ni. Tirhkoh Paula chuan, "Mihring tawng te leh van tirhkoh tawngte in thu sawi mah ila,hmangaihna ka neih si loh chuan dàr-ri mai mai emaw, dàrbenthek-ri mai mai emaw ka lo ni ang. Tin,thuhril theihna neiin, thuruk zawng zawng leh hriatna zawng zawng hre vek mah ila,tlàng sawn theihna khawp hial rinna famkim nei mah ila, hmangaihna ka neih si loh chuan eng mah ka ni lo vang.(1Korinth-13:1-2), a lo ti tawp mai a ni. Chuvangin, ringtu nun leh hmangaihna hi a inzawm tlat a,a taka kan hman theuh chuan kan inunauna a nghet anga,thawhhona a tha anga,kohhran a lo hlim anga,Hmangaihna Ram chu he leiah pawh hian kan lo chen lawk thei mai dawn a ni.

Pathian thu chuan, "Pathian chu hmangaihna a ni si a;Tu pawhin Pathian a hmangaih chuan a unau pawh a hmangaih bawk tur a ni," (1Johana-4:8&21) a ti a ni. Chuvangin,Lalpa thuthlung vanga insuihkhawm,unau hmangaih Philadelphia inti thinte hian hmangaihna kan thlahthlam mèk tawh hi kan tih nun thar leh a va tul em. Amaherawhchu,unau inhmangaih tur a ni tih a nih reng lai hian Pathian thu in a tum loh zawk hmangaihna mangkhàwng,Setana thang kam,Thlarau Thianghlim phena inngaihzàwnna lakah erawh chuan kan awh lohna turin kan fimkhur a trul èm èm thung si a ni. He thangah hian mi tam tak an lo awk tawh thin a,Thlarau Thianghlim phena thlarau sual hnathawh ruk chu do zo lo vin,mualpho takin an tluk phah thin a,a pawi èm èm a ni. Paula chuan, "Hmangaihna chu vevèkna tel lovin ni rawh se,"(Rom-12:9) tiin a sawi a ni.  Pathian atanga chhuak hmangaihna dik tak chu-a che mawi lo lo va,mahni hmà a sial lo va,a dawhthei a,a itsik lo va; a infak lo va,a uang lo va,a thinur duh lo va,sual lamah a ngaihtuah lo va; fel lohnaah a làwm lo va,thutak erawh a lawmpui thin a (1Korinth-13:4-6) ni. He 'Inhmangaihna bik ram' erawh hi chu Pathian thil tum leh Pathian thuin a kawh pawh niin a lang lo va,"Duh takte u,i inhmangaih tawn theuh vang u," (1John-4:7) a ti zawk a ni. Chuvangin, kohhran hote hi a bikte te a inhmangaih thliah thliah tur ni lovin,kan zavaia inhmangaih tawn theuh tur kan ni zawk a ni. Chutianga kan inhmangaih tawn theuh a nih ngat chuan rawngbawl ho a nuam anga,Kohhran pawhin hmà a sawn anga,a hlim pawh kan hlim ngei ang.

Hmangaihna hi kan Pathian hian a lo ngai pawimawh èm a ni. "Heng pathum- rinnate,beiseinate,hmangaihnate hi a awm reng ang; tin,hengah te hian a ropui ber chu hmangaihna hi a ni," (1Korinth-13:13) tiin a lo sawi a. Chu Hmangaihna chu um zel turin min chah  (1Korinth-14:1) bawk a ni. Chuvangin,kohhran hote hian, hmàna inhmangaih dial dial kohhran nia miten min lo hriat dan thin kha chhawm nung tha leh ila,sawichhiata kan awm lohna turin i dinthar leh teh ang u hmiang.  Chutichuan he kan khualzinna rama kan chàm chhung pawh hian kan beisei ram,rinna mita kan thlir thin, hmangaihna ram nun chu tem lawkin,Kohhran hi 'HMANGAIHNA RAM' nuam takah kan siam anga,hlim takin Lalpan amah hmangaihtute tana a buatsaih,hmangaihna ram Zion tlàng mawi chu panin kan kal ho dial dial dawn alawm.

"Pathian chu Hmangaihna a ni si a (1Johana-4:8).