ISUA CHU PATHIANAH A INCHHAL TIH JUDATE’N AN HRIA

 ISUA CHU PATHIANAH A INCHHAL TIH JUDATE’N AN HRIA

 

Judate chuan Pathian tisaa a lo chan theih dan chu an hrethiam thei lova, Isua’n Amah chu Pa a nih thu a hrilh  tum khan an hrethiam thei ngang lo a ni (Johana 8:19-27). Pathianah a inchhal tih erawh chu an hre fo tawh a. Sabbath ni a Isua’n damlo a tihdam khan A Pa tihdamah a chhal a, Judate chuan tihhlum an tum ta a- Sabbath a bawhchhiat avang chauh pawh ni lovin, Pathian chu ama Paah a chhal avang leh Pathian tluka a insiam avangin tihhlum an tum a ni (Johana 5:17-18).

Tum khat chu Isua’n, “Abrahama kha ka ni hmu tur a nih avangin a hlim em em thin a, tin, a hmu ngei a, a lawm hle a” a ti a. Judate’n, “Abrahama i hmu em ni?” an ti a. Isuan a chhang a, “Abrahama awm hma pawhin ka awm” a ti a. Chu veleh Judate’n, “AWMA KA NI” titu kha “Keimah hi ka ni” a tihna a ni tih an hrethiam ta a, Jehova’n Amah a inpuanna hming kha a ni si a, tichuan lung an chhar a, (an ngaihdanin) Pathian a tih hmingchhiat avangin den hlum an tum ta a (Exodus 3:14, Johana 8:56-59).

Isua’n, “Kei leh ka Pa chu pumkhat kan ni” a ti a, Judate’n Pathian a sawichhiat avangin denhlum an tum leh ta a, mihring ni siin Pa Pathianah Amah chu a inchhal avangin (Johana 10:30-33). Amahah chuan Pa chu awma a sawi avang leh Pa chu Amah ni nghala a insawi avangin tihhlum an tum tlat a ni (Johana 10:38-39). 

Mi pakhat zeng a tihdam khan Isua’n sual zawng zawng a ngaihdam sak a, Judate chuan Pathian chauh chu sual ngaidam theitu a ni tih an hre si a, Isua chu sual ngaidam thei Pathian a ni tih an hre si lova, sual a ngaihdam sak si avangin Pathian a sawichhiaah an ngai tlat a (Isaia 43:25). Isuan an ngaihtuahna a hriatsak a, zeng a tidam a, Pathian a nihzia a lantir a, Pathian thiltihtheihna a hmang a (Luka 5:20-26).

Judate hian Pathian pakhat chauh an ring a, chu Pathian chauh chuan sual a ngaidam thei  tih an ring bawk a, an rinna hi a dik a ni. Chu Pathian pakhat chauh chu (Pa leh Jehova chu) Isua hian niin a insawi a ni tih hi Judate hian an hria a ni. Isua’n ni a a inchhal an rinsak duh lo erawh hi chu an tisual ta a ni.

Lalpa’n a Pathianna a puanna hi mi thenkhatte’n tunlai thleng hian an la hnawl a, a mak a ni. a thusawi awmzia lah an hre thei hek lo. Isua dodaltu Judate’n Isua’n Pa, Pathian, Jehova niah a inchhal tih an hriatsak a; nimahsela tunlai thleng pawh hian Pathian thuin chiang taka a sawi pawh mite’n an hmu thei si lo.

ISUA KRISTA NIHNA PUANCHHUAHNA

Thupuan buah hian Isua Pathianna, thu thiltithei tam tak a awm a ni. Pathianin Johana lehkhabu a ziahtir nachhan hi hun lo la awm tûrte tihlan chauh ni lovin Isua Krista nihna khuhhawnna emaw puanchhuahna emaw hi a tum tel bawk a ni. A dik a dik chuan Johana thil ziakte hian Pathian pakhat chauh a nihna thu te, Krista nihna pahnih te a sawi uar em em a ni. Johana hian Chanchin Tha Johana a ziak bawk a, chutah chuan Isua  hi Krista a ni tih kan rin theihna tur te, Pathian Fapa a nih thu te a ziak a (Johana 20:31). Isua hi Pathian Fapaa kan pawm a nih chuan Amah chu Pathian atan kan pawm tihna a ni a, “Pathian Fapa” tih awmzia chu “Tisaa lo chang Pathian” tihna mai a nih avangin. (Bung 5: PATHIAN FAPA tih en belh la). Johana hian Isua chu Pathian a ni tih thu a sawi kim vek a. Johana lehkhaziakte hian Isua Pathianna a chawisang a, Thupuan Bu pawh hi chung zinga mi chu a ni.

Thupuan 1:1 thu hian Thupuan Bu hi Isua Krista thupuan chhuah Bu a ni tih a sawi a. Thupuan tih hi Greek tawng chuan ‘Apokalupsis’ a ni a, he thu atang hian ‘Apocalypse’ tih hi a lo piang a. A awmze ngial ngan chu “Khuh hawng” emaw “Khuhna Hlip” tihna a ni. He lehkhabu hi thil lo thleng tûrte hrilhlawkna a ni ngei mai a, he hrilhlawkna a tulna chhan chu Isua Krista nihna hailan a, tunge a nih tih tihlan a ni. Bible zirtu tak tak chuan he lehkhabu hrilhlawkna thlen dik dan a chhui ang a, chu aia pawimawh zawk chu hrilhlawkna chhan hriat a ni ang a,hmalam huna Isua Krista inpuan thin dan hriatthiam zel a tum tûr a ni ang.

Thupuan Bu hian Isua chu a mihrinna leh a Pathianna a sawi ve ve a ni. Kan sualte avangin Beramno talh tawh a ni a, chutih lai chuan Lal thutthlenga thu Pathian Engkimtitheia a ni bawk a. He lehkhabuin Krista a sawidan hian kan ziak tlar dawn a ni.

THUPUAN BU-A ISUA NIHNA TE

A nihna te Thupuana a awmna lai

1. Thuhretu rinawm a ni. 1:5

2. Mitthi zing ata piang hmasaber a ni. 1:5

3. Lei lalte Rorelsaktu a ni. 1:5

4. Alpha leh Omega a ni. 1:8, 11; 21:6; 22:13

5. A Bul leh a Tawp a ni. 1:8; 21:6

6. Awmtawha, Awmmeka, Lolaawmtura a ni. 1:8; 4:8

A nihna te Thupuana a awmna lai

7. Engkimtitheia a ni. 1:8; 4:8

8. Mihring Fapa a ni.     1:13

9. A Hmasabera leh a Hnuhnungbera a ni. 1:17; 22:13

10. Mi nunga, Thia kumkhua atana nungleha a ni. 1:18

11. Thlarau pasarih neitu a ni. 3:1; 5:6

12. Lalthutthlenga thua a ni.       4:2

13. Pathian a ni.          4:8; 21:7

14. Engkim siamtu a ni. 4:11

15. Sakeibaknei, Juda hnam a mi a ni. 5:5

16. Davida Bulpui (Davida Siamtu a ni). 5:5; 22:16

17. Beram No a ni. 5:6

18. Tlantu a ni.       5:9

19. Rinawma a ni. 19:11

20. Diktaka a ni. 19:13

21. Pathian Thua a ni.  19:16

22. Lalberte Lalber a ni. 19:16

23. Lalpate Lalpa a ni.   19:16

24. Davida thlah a ni.   22:16

25. Varparh Arsi engtak a ni.    22:16

Heng nihna hmingte leh chanvo te hi Isua nihna tilangtu mawi tak an ni a, Heng thu te hian Chatuan Lalpa Pathian Engkimtithei tisaa lo chang a, thi a, tho leha hnathawh zawng zawng an tilang a ni.

Thupuan Bung hnuhnung ber hian Pathian leh Beram No chu mi pakhat angin a sawi a (Thupuan 22:3-4), tin, zawlnei thianghlimte Lalpa Pathian chu Isua ngei hi a ni tih a sawi bawk a ni (Thupuan 22:6, 16). Heng Bible chang te hian Isua chu Chatuan atan Pathian a nih thu leh A mihring taksa Beramno kha ropuinaa inthuama a lo lan tûrzia leh kumkhua a daih tûr thu mih hrilh a ni. Pathian ropuina chu Jerusalem thar tan entu a ni ang a, Isua taksa, Ropuinaa inthuam chuan a chhun eng vek dawn a ni (Thupuan 21:23).

Bible tlangkawmna Thupuan Bua bung leh changte hian A ropuina zawng zawnga inthuama mitin hnena Pathian inlan tir dan tur a sawifiah a, Isua chu Chatuan Pathian a nih reng tur zia amah  a in puanchhuahna thu min hrilh a ni. Tichuan Thupuan hi Isua Krista in puanchhuahna lehkhabu a ni.