PATHIAN PAKHAT CHAUH A AWM:- Rev. R. Sangthanga

 PATHIAN PAKHAT CHAUH A AWM:-

Rev. R. Sangthanga

 

Pathian hian vawi khat mah, "Mi nung pathum ka ni e," a tih miah loh laia, "Mi nung pathum i ni e," lo tih luih hram hi chu Setana lawm zawng tak a ni ngei ang. Pathian pakhat aia tam awma rinna hi Bible nen a in kalh tlat a, Pathian pathum (Trinity/ family) ṭhu tlar tuar tura rinna hi rin dan ât thlak tak  a ni.

 

1. PATHIAN PAKHAT A NI

 Deut.6:4- ah Pathianin, "Aw Israelte u, ngaithla teh u, Lalpa kan Pathian chauh chu Lalpa a ni," tiin Pathian chu amah chauh a nih thu a sawia,

Exo.6:4 thu hi English Bible (KJV) ah chuan, "Here, O Israel: The LORD our God is one," tiin "Lalpa kan Pathian chu pakhat chauh a ni," tiin chiang em emin a sawi a ni.Deut. 32:39 -ah Pathianin,  "Kei, keimah ngei ka nih hi hria ula, Pathian dang an awm lo ve; a ti a ngat mai a ni.

 Isaia 44:6-ah"LALPA, Israel-ho Lal, an tlantu sipaihote LALPA chuan heti hian a ti: "Kei hi hmasa bera chu ka ni a, hnuhnung bera pawh ka ni; keimah lo chu Pathian rêng rêng an awm lo," a ti bawk a.

Isaia 44:8-ah pawh, "Keimah lo hi Pathian rêng rêng an awm êm? A ni, Lungpui rêng rêng a awm lo; pakhat mah a awm ka hre lo," tiin amah lo Pathian dang an awm a hre miah lo va.

Isaia 45:5-ah"Kei hi LALPA chu ka ni, a dang rêng rêng an awm lo; keimah lo chu Pathian rêng rêng an awm lo," a ti bawk a.

Isaia 45:21- ah pawh Keimah lo chu Pathian dang rêng rêng an awm lo; Pathian fel leh chhandamtu ka ni; keimah lo chu a dang rêng rêng an awm lo," a ti a.

 

 2. THIL ZAWNG ZAWNG AWM HMAIN A AWM

Isaia 43:1-13 ah chuan, PATHIANIN "Ka awm hmain Pathian reng reng din a awm lova, ka awm hnuah poh an awm hek lo vang, keimah lo chu chhandamtu dang reng an awm lo," a ti a ni.

 

3. PATHIAN CHU ENGKIM SIAMTU A NI:-

Gen.1:1 ah "A tirin Pathianin Lei leh Van a siam a," tih kan hmu a, Lei leh Van leh a chhunga thil awm zawng zawng siamtu hi PATHIAN a ni. Isaia 44:24-ah amah ngeiin "Kei hi Lalpa thil z.z siantu, mahni chauhva van kai pharhtu ka ni," a ti a, Lei leh Van siamtu hi Pathian pakhat chauh a ni.

 

4. PATHIAN CHU TISAAH A LO CHANG

Phil.2:5-8 a kan hmuh angin, Pathian chuan min tlan a ngaih avangin, "Mihringte anga lo piangin amah leh amah a inti tlawm ta zawk a," tih kan hmu a. Pathian kha mihring angin a lokal a, amah leh amah a rawn inti tlawm mai a ni.

Pathian hi a ropuina nen inthuamin lokal ta se, Kross ah khenbeh ngam a ni lo vanga, min tlan thei lo vang, amah leh amah a rawn inti tlâwm ta mai a ni.

Krismas hlaah poh, "Leiah a lo piang Van Lal Bera chu," kan tih hi a dik em em a ni, Vana Lal ber Pathian kha mihring angin a lokal ta mai a ni e. Pathian a fapa rawn tir tak tak nise, pa aiin fapa an lal lo zawk si a, "Leiah a lo piang van lalber dawt tu," tia sak a ngai ngei ang.

I Timo.3:16 thu a, "Pathian ngaihsakna thurûk chu hnial rual lohvin a ropuia, tisaa lo langa...," tih hi Saptawng Bible-ah hetiangin ziak a ni.

i. King James Version-ah chuan "God was manifested in the flesh" (Pathian chu tisain a lo lang) tiin ziak a ni.

ii. New International Bible-ah "He appeared in a body" (A ni chu taksa neiin a lo lang) tih a ni

iii. Amplified Bible ah, He, God, was made visible in human flesh (Amah Pathian chu hmuh theihin mihring tisaah a insiam) tih a ni.

iv. New American Standard Version-ah, He who was revealed in the flesh (A ni chu tisain a rawn in lai lang) tih a ni.

v. Today's English version-ah, He appeared in human form (A ni chu mihring taksa pu-in a lo lang) tih a ni.

Hei hian Pathian chu taksa/tisa ngeia a lo chan thu an sawi chiang hle a ni.Johana 1:1-14 ah chuan "A tirin thu a  awm...thu chu PATHIAN a ni...Engkim a zain a ma siam a ni...A ni chu khawvelah a awm, khawvel ama siam a ni...Thu chu tisaah a lo changa kan zingah a lo awm ta," tiin Johanan a sawi a. Engkim siamtu Pathian ngei kha tisaah a lo chang mai a ni, engkim siamtu PATHIAN kha Isua Krista hi a ni e.

 

5. AMAH PAWHIN PATHIAN A NIH ZIA A SAWI:-

John.14:9 ah chuan "kei mi hmu chuan Pa (Pathian) a hmu a ni," a ti a. Isua hmutu chuan Pathian an hmu a ni, Pathian dang hmuh tur a awm lo.

Thupuan 1:8 leh 22:12 ah chuan Lal Isua ngeiin "Kei Alpha leh Omega, Lalpa PATHIAN, awm tawha leh awm meka leh lo la awm tura chu ka ni," a ti hmiah maia. Isua lo chu Pathian hmuh tur a awm lo.

 

6. VANTIRHKOH TE PAWHIN ISUA NGEI HI PATHIAN A NIH ZIA AN SAWI

Luka 2:13-14 ah Lal Isua a lo pian lai khan Vantirhkohten "Chungnung berah PATHIAN ropui takin awm rawh se" tiin chibai an rawn buk a.

Thupuan 4:10-11 ah Lal Isuan tlanna hna a thawh zawha Vana a lawn khan Vantirhkoh ten an lo welcome a  "Nang kan lalpa leh kan PATHIAN, ropuina te, chawimawina te, thiltih theihna te hmu tlak i ni, nangin engkim i siama i duh avanga awm leh siam a ni bawk si," an ti a ni.

 

7. RAMHUAITE PAWHIN AN HRE CHIANG KHAWP MAI.

Marka 1:24 ah Lal Isua leh ramhuai pai an intawk a, ramhuai chuan "Nang ka hria che Pathian mithianghlima i ni," (Holy one of God) tiin a au chhuak tuar tuar mai a ni.

Jacoba 2:19 ah chuan "Pathian chu pakhat a ni tih i ring maw? I ti tha e, ramhuaite pawhin an ringa an khur thin a sin," a lo ti hial a nih chu.